Сауд Арабиясы тарабынан Кыргызстандагы аялуу катмардын өкүлдөрүнө жардам берилди
Эмгек, социалдык камсыздоо жана миграция министрлигинде Сауд Арабия Падышалыгынан келген гуманитардык жардамды – социалдык жактан аялуу калк катмарына 48 тонна 720 кг курма тапшырылды. Бул тууралуу аталган министрликтин басма сөз кызматы билдирди.
Маалыматка ылайык, иш-чарага Сауд Арабия Падышалыгынын Кыргызстандагы Атайын жана Ыйгарым укуктуу элчиси мырза Ияд бин Гази Хаким, ошондой эле Король Салмандын гуманитардык жардам жана колдоо борборунун өкүлдөрү катышты.
Гуманитардык жардам карылар үйлөрүнө, балдар үйлөрүнө, анын ичинде Кыргызстан мусулмандар дин башкармалыгына, ошондой эле райондук социалдык коргоо башкармалыктары аркылуу социалдык жактан аялуу жарандарга жана үй-бүлөлөргө бөлүштүрүлөт.
Бул долбоор Король Салмандын гуманитардык жардам жана колдоо борбору тарабынан ишке ашырылып, Сауд Арабиясынын Кыргызстанга көрсөткөн системалуу гуманитардык колдоосунун бир бөлүгү болуп саналат.
Бул демилге кыргыз-сауд мамилелеринин достук мүнөзүн жана тараптардын гуманитардык кызматташтыкты өнүктүрүүгө болгон берилгендигин тастыктайт.
