Ошто күн энергиясы менен иштеген көчө чырактары пайда болушу мүмкүн
Ош шаарынын мэринин орун басары Эрнис Толтоев Кытай Эл Республикасынын жарыктандыруу тармагындагы компанияларынын өкүлдөрү менен жолугушту. Бул тууралуу муниципалитеттен билдиришти.
Жолугушууга шаар мэриясынын тышкы байланыштар, инвестиция жана туризм, социалдык өнүгүү, шаар куруу жана муниципалдык менчик бөлүмдөрүнүн жетекчилери, ошондой эле “Ошсвет” муниципалдык ишканасынын өкүлдөрү катышты.
Тараптар жолугушуунун жүрүшүндө бир катар долбоорлорду талкуулашты. Алардын бири — “Светлый район” долбоору болду. Анын алкагында кытайлык компания өз каражатына Ош шаарынын көчөлөрүнө жана коомдук жайларына күн энергиясы менен иштеген заманбап жарыктандыруу системаларын орнотууга даяр экенин билдирди.
Маалыматка ылайык, компания монтаж иштерин, керектүү жабдууларды жана материалдарды толугу менен өзү камсыздап, долбоор ишке киргенден кийин техникалык тейлөө жүргүзүүнү дагы пландап жатат.
Мындан тышкары, жолугушууда “Кооз шаар” программасынын алкагында шаарды көрктөндүрүү, жарыктандыруу жабдууларын жана курулуш материалдарын жеткирүү, жол куруу жана инфраструктуралык долбоорлорго катышуу маселелери дагы каралды.
Ошондой эле эл аралык долбоордун негизинде Ош шаарында кытайлык адистер тарабынан акысыз медициналык жардам көрсөтүү пландалып жатканы айтылды.
Жолугушуунун жыйынтыгында тараптар өз ара пайдалуу кызматташууну мындан ары да өнүктүрүүгө даяр экендиктерин билдиришти.
