Күйүүчү майдын баасын мамлекет көзөмөлгө алат
Министрлер кабинети күйүүчү-майлоочу майлардын баасын турукташтыруу боюнча жаңы токтом кабыл алды.
Жаңы чечимге ылайык, 25-майдан 30-сентябрга чейин мамлекет бензин, дизель жана суюлтулган газ импортун субсидиялайт. Өкмөт бул кадам күйүүчү май тартыштыгын алдын алып, баалардын кескин өсүшүнө жол бербөө үчүн жасалып жатканын билдирди.
Ошондой эле импорттолгон күйүүчү майга туруктуу баалар бекитилип, базар баасы менен айырманы мамлекет төлөп берет.
Мындан тышкары:
Бензин жана дизель боюнча акциздик төлөмдөрдү кечиктирип төлөөгө уруксат берилет;
күйүүчү майдын чекене баасына убактылуу мамлекеттик көзөмөл киргизилет;
мунай продукцияларын автоунаа менен алып кирүүгө болгон айрым чектөөлөр алынат.
Бийлик бул чаралар өлкөдөгү күйүүчү май рыногун туруктуу кармап, бизнес менен жарандарга жеңилдик түзөрүн айтууда.
