Айыл чарба тармагын санариптештирүү маселелери талкууланды
Суу ресурстары, айыл чарба жана кайра иштетүү өнөр жайы министрлигинде агрардык секторду санариптик трансформациялоо маселелери боюнча жумушчу кеңешме өттү. Бул тууралуу ведомстводон маалымдашты.
Жыйын министрдин биринчи орун басары Илич Марсбек уулунун төрагалыгы алдында өтүп, ага министрликтин түзүмдүк бөлүмдөрүнүн, ведомстволук мекемелердин жана тиешелүү мамлекеттик органдардын өкүлдөрү катышты.
Кеңешменин жүрүшүндө санариптик платформаларды өнүктүрүү, тармактык маалыматтарды натыйжалуу башкаруу жана айыл чарбадагы маалыматтык системаларды интеграциялоо маселелери талкууланды.
Ошондой эле "АгроСмарт" мамлекеттик мекемеси тарабынан "РАӨБ Паспорту" жана Idyikan санариптик платформаларынын мүмкүнчүлүктөрү сунушталып, аларды өнүктүрүү жана башка мамлекеттик системалар менен интеграциялоо боюнча маалымат берилди.
Мындан тышкары, Жер ресурстары, кадастр, геодезия жана картография мамлекеттик агенттиги АИС "АГРОМАП" маалыматтык системасын тааныштырып, анын агрардык тармакта мониторинг жүргүзүү жана башкаруучулук чечимдерди кабыл алууну колдоо мүмкүнчүлүктөрүн көрсөттү.
Жыйындын жыйынтыгында жооптуу бөлүмдөргө сунушталган санариптик системаларды өнүктүрүү жана аларды мамлекеттик маалыматтык системалар менен интеграциялоо боюнча деталдуу план иштеп чыгуу тапшырылды.
