Ала-Букада 98 млн сомго жаңы мектеп курулду
Жалал-Абад облусунун Ала-Бука районуна караштуу Ак-Коргон айылында 275 орундуу жаңы мектеп пайдаланууга берилди. Бул тууралуу Курулуш министрлигинен билдиришти.
Билим берүү мекемесинин курулушу республикалык бюджеттин эсебинен каржыланып, жалпы наркы 98 миллион сомду түздү.
Эки кабаттуу мектептин жалпы аянты 1246 чарчы метрди түзөт. Анда окуучулардын сапаттуу билим алышы үчүн бардык шарттар каралган.
Маалыматка ылайык, жаңы окуу жылынан тарта мектепте эки нөөмөт менен 600гө жакын окуучу билим алат.
Курулуш иштеринин жүрүшү Курулуш министрлигине караштуу Турак жай-жарандык курулуш департаменти тарабынан көзөмөлдөндү.
