Жаратылыш парктарын модернизациялоого 80 млн сом жумшалат
Жаратылыш ресурстары, экология жана техникалык көзөмөл министрлиги өзгөчө корголуучу жаратылыш аймактарындагы инфраструктураны жакшыртуу максатында “Кыргызстройсервис” мамлекеттик ишканасы менен келишимге кол койду. Долбоордун жалпы наркы 80 миллион сомго жакын каражатты түзөт.
Келишимдин алкагында Сары-Челек мамлекеттик биосфералык коругунда жана Кыргыз-Ата мамлекеттик жаратылыш паркында заманбап өткөрүү пункттары курулат. Ошондой эле өлкөдөгү 16 мамлекеттик жаратылыш паркында жана коруктарында автоматташтырылган өткөрүү пункттарын орнотуу пландалууда.
Долбоор өзгөчө корголуучу жаратылыш аймактарын башкаруунун натыйжалуулугун жогорулатууга, конокторду каттоо системасын өркүндөтүүгө жана каржылык агымдардын ачык-айкындуулугун камсыз кылууга багытталган.
Мындан тышкары, автоматташтырылган чечимдер конокторду каттоо процессин санариптештирүүгө, адам факторун азайтууга, экологиялык объектилердеги көзөмөлдү жана коопсуздукту күчөтүүгө шарт түзөт. Ошондой эле бул чаралар коррупциялык тобокелдиктердин алдын алууга көмөк көрсөтөт.
Долбоордун ишке ашырылышы жарандарга жана туристтерге ыңгайлуу шарттарды түзүү менен катар жаратылыш аймактарын натыйжалуу башкарууга жаңы мүмкүнчүлүктөрдү ачат.
