Ортоазиялык кундузду мыйзамсыз аткандарга 20 миң сом айып салынат
Жаратылыш ресурстары, экология жана техникалык көзөмөл министрлиги мыйзамсыз аңчылыкка каршы күрөштү күчөтүп жатканын билдирди.
Ведомствонун маалыматына ылайык, өлкө аймагында жаныбарлар дүйнөсүн коргоо жана браконьерликке бөгөт коюу максатында туруктуу негизде рейддер жана текшерүүлөр жүргүзүлүүдө. Ошондой эле жарандардан түшкөн маалыматтардын негизинде да мыйзам бузуулар аныкталып, тиешелүү чаралар көрүлүп жатат.
Министрлик Кызыл китепке кирген жана сейрек кездешүүчү жаныбарларды мыйзамсыз атып же жок кылуу мамлекетке келтирилген зыянды төлөөгө алып келерин эскертти.
Бекитилген тарифтерге ылайык, мыйзамсыз алынган:
- Ортоазиялык күндуз жана мензбир сууру үчүн – 20 миң сом;
- Брандт кирписи, индия кирписи, суусар жана чаар күсөн үчүн – 10 миң сом;
- Узун ийнелүү кирпи, суу чычкан, айрым жарганаттар жана башка сейрек кездешүүчү жаныбарлар үчүн – 10 миң сом өлчөмүндө зыян өндүрүлөт.
Министрлик жарандарды жаратылышты коргоо мыйзамдарын так сактоого чакырып, мыйзамсыз аңчылык фактылары тууралуу 108 ишеним телефону аркылуу билдирүүгө болорун маалымдады. Маалымат берген адамдардын купуялуулугу сакталат.
