Тамчыдагы мыйзамсыз курулуш токтотулуп, 200 миң сом айып салынды
Ысык-Көл облусунун Тамчы айылында курулуш мыйзамдарын бузуу менен салынып жаткан объекттин курулушу убактылуу токтотулду. Бул тууралуу Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаменти билдирди.
Маалыматка ылайык, департаменттин Ысык-Көл регионалдык башкармалыгы тарабынан жүргүзүлгөн текшерүүнүн жүрүшүндө Тамчы айылынын Ш. Усубакунов көчөсү, 1 дарегинде жайгашкан курулуш объектисинде бир катар мыйзам бузуулар аныкталган.
Тактап айтканда, объект уруксат берүүчү документтерсиз жана макулдашылган долбоорсуз курулуп жатканы белгилүү болгон. Ошондой эле курулушта өрт коопсуздугу боюнча талаптар жана коңшу жер тилкесине чейинки минималдуу аралык сакталбаганы аныкталган.
Аталган мыйзам бузуулар боюнча курулуш иштерин жүргүзгөн жаранга карата акт жана протокол түзүлүп, мыйзам бузууларды белгиленген мөөнөттө жоюу талабы коюлган. Мындан тышкары, ага 200 миң сом өлчөмүндө айып пул салынып, курулуш иштери убактылуу токтотулган.
Мамлекеттик архитектура-кулуш контролдоо департаменти курулуш иштерин жүргүзгөн бардык тараптарды мыйзам талаптарын жана курулуш ченемдерин так сактоого чакырып, талаптар аткарылбаган учурда жоопкерчилик караларын эскертти.
