Ош жана Баткенде террордук уюмдардын мүчөлөрү кармалды
Ош жана Баткен облустарында эл аралык террордук уюмдардын 31 мүчөсү кармалды. Бул тууралуу Улуттук коопсуздук боюнча мамлекеттик комитет билдирди.
Атайын кызматтын маалыматына ылайык, 9-июнга караган түнү кеңири масштабдагы антитеррордук операция жүргүзүлүп, Оштон 11 , Баткенден 20 шектүү колго түшүрүлгөн. Алар "Катиба аль-Таухид валь-Жихад" жана "Ислам мамлекети" уюмдарынын мүчөлөрү болушкан.
Шектүүлөр укук коргоо органдарынын кызматкерлерине жана диний ишмерлерге каршы террордук актыларды уюштурууну пландап жатышканы аныкталганы айтылды.
Атайын операцияны координациялоо үчүн Ички иштер министрлиги, Чек ара кызматы, Коргоо министрлиги, Өзгөчө кырдаалдар министрлиги, Саламаттык сактоо министрлиги өкүлдөрү, президенттин аймактардагы өкүлдөрү жана Ош шаарынын мэриясы катышкан ыкчам штаб түзүлгөн.
Тинтүү иштеринин жүрүшүндө кармалгандардан диний-экстремисттик адабияттар, экстремисттик материалдар сакталган электрондук маалымат каражаттары, каттоодон өтпөгөн төрт курал, террордук уюмдардын символикалары жана чет өлкөлөрдөгү жашыруун террордук түзүмдөрдү каржылоого арналган каражаттар алынган.
УКМК атайын операция мыйзам талаптарына ылайык жүргүзүлгөнүн белгилеп, учурда иштин бардык жагдайларын аныктоо боюнча тергөө амалдары уланып жатканын билдирди.
