Жалал-Абаддык окуучу кыз Түндүк уюлда эл аралык экспедицияга катышат
Жалал-Абад облусунун Майлуу-Суу шаарындагы №54 мектептин 8-классынын окуучусу Мээрим Турдумахаматова “Росатомдун” - “Билимдин муз жаргычы” эл аралык илимий-билим берүү долбоорунун жеңүүчүсү болуп таанылды.
“Билимдин муз жаргычы” илимий-агартуучу долбооруна катышуучуларды тандоо 5-майда башталып, үч этап менен өттү. Ага Армения, Бангладеш, Беларусия, Боливия, Бразилия, Венгрия, Вьетнам, Египет, Индия, Индонезия, Казакстан, Кытай, Кыргызстан, Монголия, Мьянма, Намибия, Руанда, Сербия, Танзания, Түркия, Өзбекстан жана Түштүк Африкадан келген 14 жаштан 16 жашка чейинки 5 миңге жакын таланттуу мектеп окуучулары күч сынашып, мыктылардын мыктысы катары 22 окуучу тандалып алынган.
Росатомдун маалыматына караганда, жеңүүчүлөр үч баскычтуу тандоодон өтүштү. Алар илимий викторинага катышып, атомдук энергетика, заманбап технологиялар жана Арктика боюнча билимдерин сынашып, финалда "Атомдук технология бүгүн дүйнөнү кандай өзгөртүп жатат?" деген темада чыгармачыл долбоорлорун коргошкон.
Эл аралык тандоо сынагынын жеңүүчүлөрүнүн тизмеси долбоордун расмий сайтында жайгашкан.
"Чынымды айтсам, мен дагы деле ушунун баары мени менен болуп жатканына ишене албай турам. Мен сынакка өз ишимди жибергенде, жөн гана өз күчүмдү сынап көргүм келген, эми Түндүк уюлга барганы калдым. Сынак оңой болгон жок, бирок мен өзүмдү көргөзө алдым", - деп бөлүштү Мээрим Турдумахаматова.
Эми жаш чилистендер август айында дүйнөдөгү жалгыз атомдук муз жаргыч флотунун өкүлү болгон “Жеңишке 50 жыл” кемеси менен Түндүк уюлга уюштурулган эл аралык экспедицияга катышууга барышат.
Экспедиция учурунда катышуучулар үчүн атомдук технологиялар, Арктиканы изилдөө жана илим боюнча лекциялар, мастер-класстар жана практикалык эксперименттер уюштурулат.
"Билимдин муз жаргычы" илимий-агартуучу долбоор - "Росатом" мамлекеттик корпорациясынын колдоосу менен уюштурулган. Ал табигый илимдерди жана атомдук тармактын технологияларын жайылтууга, таланттуу жана шыктуу балдарды аныктоого жана колдоого, алардын жөндөмдөрүн өнүктүрүүгө жана кесиптик багыт берүүгө багытталган.
