Жаңы тез жардам унаалары сатылып алынат
Тез жардам кызматынын иши менен жеринен таанышуу максатында Саламаттык сактоо министри Дамир Осмонов Бишкек шаардык Тез жардам борборуна барды.
Саламаттык сактоо министрлигинин маалыматына ылайык, министр диспетчердик борбордун иши, чакырууларды кабыл алуунун автоматташтырылган системасы жана бригадалардын ишин координациялоо тартиби менен таанышты.
Иш сапардын жүрүшүндө жол-транспорт кырсыгы тууралуу чакыруу түшүп, министр тез жардам бригадасы менен бирге окуя болгон жерге барып, кызматтын ишин реалдуу шартта көрдү.
Кызматкерлердин айтымында, негизги көйгөйлөрдүн бири – тез жардам унааларынын жетишсиздиги бойдон калууда. Учурда Саламаттыкты сактоо министрлиги жаңы тез жардам автоунааларын сатып алуу боюнча тендердик процедураларды жүргүзүүдө.
Бишкек шаарында кошумча төрт тез жардам көмөк чордонунун иши уюштурулган. Бирок санитардык автоунаалардын жетишсиздигинен улам алар азырынча толук кубаттуулукта иштей элек. Жаңы автоунаалар келгенден кийин бул көмөк чордондору толук ишке киргизилип, тез жардам бригадаларынын бейтаптарга жетүү убактысы кыскарып, шашылыш медициналык жардамдын жеткиликтүүлүгү жогорулайт.
