Президент оңдоп-түзөөдөн өтүп жаткан парктын курулушу менен таанышты
Президент Садыр Жапаров 1-июлда, Ысык-Көл облусуна болгон иш сапарынын жүрүшүндө Каракол шаарындагы А.Пушкин атындагы сейил бакты оңдоп-түзөөнүн жүрүшү менен таанышты. Бул тууралуу президенттик админстрациянын маалыматтык саясат бөлүмүнөн билдиришти.
Маалыматка ылайык, мамлекет башчысына сейил бактын жалпы аянты 7,5 гектарды түзөрү маалымдалды. Оңдоп-түзөөнүн алкагында административдик имарат жана амфитеатр курулуп, сегиз заманбап аттракцион, анын ичинде айланма дөңгөлөк жана америкалык “горкалар” орнотулду, каскаддуу жана кургак фонтандар, балдар оюн аянтчасы жана скейт аянтчасы курулду.
Мындан тышкары, сейил бактын аймагы көрктөндүрүлүп, жөө адамдар үчүн жолдор салынды, унаа токтотуучу жайлар уюштурулуп, жашылдандыруу иштери жүргүзүлүп, автоматтык сугаруу жана тышкы жарыктандыруу системалары орнотулду.
