“Түндүк” мобилдик тиркемеси аркылуу “Бала ырысы” жөлөк пулун кантип тариздесе болот
КРнын Эмгек, социалдык камсыздоо жана миграция министрлиги ай сайын төлөнүүчү “Бала ырысы” жөлөкпулун “Түндүк” мобилдик тиркемеси аркылуу тапшыруунун жол жобосун жарыялады.
Билдирүүгө караганда, арыз берүү үчүн интернетке туташкан смартфон, паспорт жана арыз ээсинин атына Элдик Банк же Айыл Банкта ачылган банктык эсеп талап кылынат. Эгерде эсеп жок болсо, аны ушул банктардын биринин мобилдик тиркемеси аркылуу онлайн ачууга болот. Катталгандан кийин банк автоматтык түрдө «талап боюнча» эсеп ачат жана жөлөкпул дал ушул эсепке которулат.
- Жөлөкпулду тариздөө үчүн алгач «Түндүк» тиркемесин орнотуп, каттоодон өтүп, аралыктан биометрикалык идентификациядан өтүү жана системага кирүү зарыл.
- Андан соң «Кызматтар» бөлүмүнөн «Социалдык төлөмдөр» категориясын тандап, «Бала ырысы» кызматын ачуу керек.
- Арыз толтурулуп жаткан учурда система арыз ээси жана бала тууралуу маалыматтарды, анын ичинде туулгандыгы жана катталган дареги боюнча маалыматтарды автоматтык түрдө текшерет.
- Текшерүү ийгиликтүү аяктагандан кийин электрондук арызды жөнөтүү гана калат. Арыздын кароо баскычын «Арыздардын тарыхы» бөлүмүнөн көзөмөлдөөгө болот.
Министрлик ошондой эле жөлөкпул дайындоонун негизги шарттарын эске салды. Жөлөкпул үч жашка чейинки балдарга дайындалат. Баланын ПИНи көрсөтүлгөн туулгандыгы тууралуу күбөлүгү болушу керек. Ошондой эле арыз ээси менен бала бир дарек боюнча каттоодо турушу зарыл.
Эгерде каттоо дареги өзгөргөн болсо, анда маалыматтарды алдын ала Калкты тейлөө борбору (КТБ), жергиликтүү өз алдынча башкаруу органы же айыл өкмөтү аркылуу жаңыртуу керек.
Мобилдик тиркемени колдонууга мүмкүнчүлүгү жок жарандар жашаган жери боюнча Кыргыз Республикасынын Эмгек, социалдык камсыздоо жана миграция министрлигинин аймактык башкармалыгына жеке өзү кайрылып, арыз бере алышат.
