Баткенде транзиттик жүктөр боюнча коррупциялык схема аныкталды
Баткен облусунда бажы, чек ара жана ветеринардык кызматтын айрым кызматкерлеринин катышуусунда уюштурулган коррупциялык схема аныкталып, шектүүлөр кармалды.
Мамлекеттик бажы кызматынын маалыматына ылайык, коррупциялык схема Ички иликтөөлөр башкармалыгы менен УКМКнын Баткен шаары жана Баткен облусу боюнча башкармалыгынын 6-бөлүмү жүргүзгөн биргелешкен ыкчам-издөө иш-чараларынын жүрүшүндө аныкталган.
Тергөөдө белгилүү болгондой, "Баткен" бажысынын, Чек ара кызматынын жана ветеринардык кызматтын айрым кызматкерлери кызматтык абалынан кыянаттык менен пайдаланып, транзиттик жүктөрдү Кыргыз Республикасынын аймагында мыйзамсыз калтырууга көмөктөшүү үчүн системалуу түрдө мыйзамсыз акчалай сыйлык алып турушкан.
Учурда бул факты боюнча тергөө иш-чаралары уланууда.
Мамлекеттик бажы кызматы коррупцияга каршы күрөш ырааттуу жүргүзүлүп жатканын белгилеп, укук коргоо органдары менен биргеликте мындай мыйзамсыз көрүнүштөрдү аныктоо жана бөгөт коюу иштери мындан ары да улантыларын билдирди.
