Ошто бир нече жолу мыйзам бузган курулуш компаниясынын лицензиясы токтотулду
Ош шаарында мыйзамсыз курулуш жүргүзгөн "Алтын Строй Групп" компаниясынын лицензиясы токтотулду. Буга чейин компанияга эки жолу 200 миң сомдон айып пул салынып, материалдар укук коргоо органдарына өткөрүлгөн. Бул тууралуу Курулуш министрлигинен билдиришти.
Мамлекеттик архитектура-курулуш контролдоо департаментинин Ош шаардык башкармалыгы 7-апрелде Курманжан-Датка көчөсү, 54 дарегиндеги көп кабаттуу турак жай архитектуралык-уруксат берүүчү документтерсиз жана мамлекеттик экспертизанын оң корутундусусуз курулуп жатканын аныктаган. Натыйжада курулуш токтотулуп, компанияга 200 миң сом айып пул салынган.
Кийинчерээк ушул эле компания Курманжан-Датка көчөсү, 24 дарегинде дагы документтери жана мамлекеттик экспертизанын оң корутундусу жок жер казуу иштерин жүргүзүп жатканы аныкталып, курулуш кайрадан токтотулган.
22-июнда жергиликтүү тургундардын кайрылуусунун негизинде жүргүзүлгөн текшерүүдө курулуштан улам тротуар бузулганы аныкталып, компанияга дагы 200 миң сом айып пул салынган.
Текшерүүнүн жүрүшүндө эки объектте тең курулуш мыйзамсыз уланып жатканы аныкталып, материалдар Ош шаардык прокуратурасына жана УКМКнын Ош шаары жана Ош облусу боюнча башкармалыгына жөнөтүлгөн.
Бардык мыйзам бузууларды эске алуу менен "Алтын Строй Групп" курулуш компаниясынын лицензиясы токтотулду.
