Курулуштагы көрктөндүрүү талаптарынын аткарылышы боюнча рейд жүрүүдө
Бишкекте курулуп жаткан эки көп кабаттуу турак жайда аймактарды көрктөндүрүү талаптары сакталбаганы аныкталып, курулуш компанияларына административдик чаралар көрүлүүдө.
Курулуш, архитектура жана турак жай-коммуналдык чарба министринин “Курулуш объекттерин ишке ашырууда аймактарды көрктөндүрүүнү камсыз кылуу жөнүндө” буйругунун негизинде борбор калаада курулуш объектилерин текшерүү боюнча рейддик иш-чаралар уланууда.
Мамлекеттик архитектура-курулуш контролдоо департаментинин маалыматына ылайык, Горький көчөсү 1 дарегинде курулуп жаткан 14–16 кабаттуу турак жай жана 7-Апрель көчөсү 156/3 дарегиндеги 16 кабаттуу турак жай текшерилди.
Текшерүүнүн жүрүшүндө курулуш объектилеринин айланасын көрктөндүрүү боюнча бир катар талаптар аткарылбаганы аныкталган. Тактап айтканда, ички жолдорду уюштуруу, тротуарларды куруу, унаа токтотуучу жайларды жасоо, тышкы жарыктандыруу, жашылдандыруу жана аймактарды көрктөндүрүү иштери талаптагыдай жүргүзүлгөн эмес.
Аталган мыйзам бузууларга байланыштуу курулуш иштерин жүргүзүп жаткан "Голден Констракшн" жана "Эридан" ЖЧКларына милдеттүү көрсөтмөлөр берилип, мыйзам бузууларды жоюу боюнча административдик чаралар көрүлүүдө.
Мамлекеттик архитектура-курулуш контролдоо департаменти КР КН 12-02:2018 "Курулуш өндүрүшүн уюштуруу" ченемдик документинин талаптары сакталбаган учурда курулуш-монтаждоо иштерин жүргүзүүгө жол берилбей турганын эскертти.
