Н.Орунтаев: Жаңы окуу жылына карата 36 мектеп пайдаланууга берилет

Бишкек, Ош жана Манас шаарларында курулуп жаткан 36 ири мектеп 2026-2027-жаңы окуу жылынын башталышына карата пайдаланууга берилет. Бул тууралуу Курулуш, архитектура жана турак жай-коммуналдык чарба министри Нурдан Орунтаев “Биринчи радионун” түз эфиринде билдирди.

Президент Садыр Жапаровдун жеке көзөмөлүндө Бишкек шаарында 20, Ош шаарында 10 жана Манас шаарында 6 ири мектептин курулушу жүрүп жатат.

Министрдин айтымында, Бишкекте курулуп жаткан мектептердин эң кичинеси 550–700 орунга ылайыкталса, эң ириси 1200 окуучуга эсептелген.

Ал эми Ош шаарында салынып жаткан 10 мектеп жалпы 50 миңге жакын окуучуну мектеп орундары менен камсыздай турганын белгиледи.

"Биз быйылкы жылы мектеп орундарына байланыштуу көйгөйлөрдү чечүүгө аракет кылуудабыз. Мисалы, Бишкекте 20 мектеп куруу менен 100 миңге жакын баланы мектеп оруну менен камсыз кылабыз”, — деди Нурдан Орунтаев.

Министр ошондой эле учурда өлкө боюнча жалпысынан 540 объект курулуп жатканын айтты. Анын ичинен 200гө жакыны мектеп, 50дөн ашыгы бала бакча болсо, калгандары башка багыттагы объектилер.

Анын маалыматына ылайык, быйыл бул объектилердин ичинен 200гө жакынын пайдаланууга берүү пландалууда.