Абаны булгагандарга карата айып пул салынды
10-июлда Жаратылыш министрлигине караштуу Экологиялык жана техникалык көзөмөл кызматы, Жол кыймылынын коопсуздугун камсыздоо кызматынын кызматкерлери менен биргеликте Бишкек шаарынын Көк-Жар айылында рейддик иш-чара өткөрдү.
Рейддин негизги максаты – автотранспорт каражаттарынан атмосфералык абага зыяндуу заттардын нормадан ашык бөлүнүп чыгышын аныктоо жана мыйзам бузгандарга карата тиешелүү чараларды көрүү болду.
Текшерүүнүн жүрүшүндө мыйзам талаптарын одоно бузган жарандарга карата протоколдор түзүлүп, жалпы 22 500 сом өлчөмүндө айып пул салынды.
Автоунаалардан чыккан коюу кара түтүн жана уулуу газдар Бишкек шаарындагы абанын булганышынын негизги себептеринин бири болуп саналат. Алардын курамындагы көмүр кычкыл газы, азот кычкылдары, күкүрт кошулмалары жана майда бөлүкчөлөр адамдардын ден соолугуна олуттуу зыян келтирип, дем алуу органдарынын, жүрөк-кан тамыр ооруларынын көбөйүшүнө, ошондой эле экологиялык абалдын начарлашына алып келет.
Экологиялык жана техникалык көзөмөл кызматы атмосфералык абаны коргоо жана экологиялык мыйзамдардын талаптарын камсыз кылуу максатында мындай рейддик иш-чараларды жыл бою үзгүлтүксүз жүргүзөт. Мыйзам талаптарын бузган бардык жарандарга карата мыйзам чегинде тиешелүү чаралар көрүлөт.
