"Бишкек Арена" сентябрдын аягында расмий ачылат
"Бишкек Арена" стадионунун расмий ачылышы сентябрдын аягына чейин жалпы кыргызстандыктардын катышуусунда чоң салтанат менен өтөт. Бул тууралуу Президенттин басма сөз катчысы Аскат Алагөзов билдирди.
Анын айтымында, 31-августта "Бишкек Аренада" Дүйнөлүк көчмөндөр оюндарынын ачылыш аземи гана өткөрүлөт. Бул күнү оюндарга катышкан өлкөлөрдүн командаларынын парады өтүп, мамлекет башчыларынын катышуусунда кыска концерттик программа уюштурулат.
Ал эми стадиондун расмий ачылышы өзүнчө майрамдык иш-чара катары сентябрдын аягына чейин өткөрүлөт.
"Биздин сыймыгыбыз болгон “Бишкек Аренанын” расмий ачылыш салтанаты жалпы кыргызстандыктардын катышуусунда, шаан-шөкөт жана эстрада жылдыздарынын концерти менен сентябрдын аягына чейин өтмөкчү", — деп жазды Аскат Алагөзов.
Ал ошондой эле мындай чечимдин себебин түшүндүрүп, өлкө жетекчилиги жаңы стадиондун ачылышына бардык жарандардын катышуусуна мүмкүнчүлүк түзүүнү көздөп жатканын белгиледи.
"Өлкө жетекчилигинде ушундай ири имарат же чоң долбоор болобу, ар бир кыргызстандыктын салымы бар, ошондуктан жамы журттун катышуусунда жакшынакай майрамдык маанайда өтүшү керек деген изги тилек бар. Демек, өлкө сыймыгы боло турган имарат жумурай журттун бата-тилеги менен ачылганы туура деп эсептейбиз", — деди ал.
