Кадамжайда 69 млн сомго жаңы бала бакча курулду

Кадамжай шаарында “Аленушка” балдар бакчасынын курулушу аяктап пайдаланууга берилди. Министрлер Кабинети менен Дүйнөлүк банктын ортосундагы кызматташтыктын алкагында, Дүйнөлүк банктын каржылоосу менен АРИС тарабынан ишке ашырылып жаткан аймактык экономикалык өнүгүү долбоору аркылуу курулду. Бул тууралуу прзеиденттин Баткен облусундагы ыйгарым укуктуу өкүлчүлүгүнөн билдиришти.

Маалыматка ылайык, долбоордун жалпы наркы 69 миллион сомду түздү. Эки кабаттуу бала бакча 90 орунга ылайыкташтырылып, анда балдардын сапаттуу билим алып, тарбиялануусу үчүн бардык заманбап шарттар түзүлгөн. Имарат окуу жана оюн бөлмөлөрү, уктоочу жайлар, ашкана, санитардык түйүндөр, жылытуу жана башка керектүү инженердик системалар менен камсыздалган.

Учурда курулуш иштери толугу менен аяктап, объектти пайдаланууга берүү боюнча акыркы даярдык иштери жүргүзүлүүдө.

Президентинин Баткен облусундагы ыйгарым укуктуу өкүлүнүн орун басары Абдирашит Ташбалтаев объекттин даярдыгы менен жеринен таанышып чыгып, тиешелүү мекемелерге бардык уюштуруу иштерин өз мөөнөтүндө бүткөрүп, бала бакчаны 31-август – Эгемендүүлүк күнүнө карата пайдаланууга берүү боюнча тапшырмаларды берди.

Жаңы бала бакчанын пайдаланууга берилиши мектепке чейинки билим берүү кызматтарынын жеткиликтүүлүгүн кеңейтип, Кадамжай шаарынын тургундары үчүн маанилүү социалдык объекттердин бири болот.