Ошто айыл чарба жарманкеси өтөт

12-июлда Ош шаарынын борбордук базарындагы “Тешик-Таш” мөмө-жемиш базарынын аймагында кеңири масштабдуу айыл чарба жарманкеси өтөт. Бул тууралуу Ош шаардык мэриясынан билдиришти.

Маалыматка ылайык, бул жарманкеде ата мекендик дыйкандар өздөрү өстүргөн жаңы, таза жашылча-жемиштерди түз, ортомчусуз жана арзан баада шаар тургундарына тартуулашат. Иш-чарага каалаган бардык дыйкандар өз өндүрүмү менен катыша алышат.

Ош шаардык мэриясы иш-чара учурунда катышуучулардын жана коноктордун коопсуздугу толук камсыздаларын билдирди. Ошондой эле сапаттуу жана арзан азыктарды алып калууга үндөйт.