Чүйдө жүгөрүнүн түшүмдүүлүгүн тамчылатып сугаруу арттырууда
Чүй облусунун Сокулук районундагы “Жарык ынтымак” кооперативи быйыл 35 гектар аянтка жүгөрү эгип, мол түшүм алууга кам көрүүдө.
Суу ресурстары, айыл чарба жана кайра иштетүү өнөр жайы министрлигинин маалыматына ылайык, кооператив 2019-жылы түзүлүп, учурда жети мүчөдөн турат. Алар жалпысынан 600 гектардан ашуун жерди иштетсе, анын 110 гектары министрликтен ижарага алынган.
Кооператив “Элдик Банктан” 6%дык жеңилдетилген насыя алып, тамчылатып сугаруу системасын орнотуп, айыл чарба техникаларын сатып алган.
“Жарык ынтымак” кооперативинин мүчөсү Эрмамат Абдисамат уулунун айтымында, быйыл 35 гектар аянтка жүгөрү себилген. Анын 20 гектарына дан багытындагы Түркиядан алынып келинген "Торо" сорту, ал эми 15 гектарына силос үчүн "Лидер 77" сорту эгилген.
Өткөн жылы кооператив жүгөрүнүн ар бир гектарынан 20 тоннага чейин түшүм алган. Быйыл болсо бул көрсөткүчтү дагы жогорулатып, гектарынан 20 тоннадан ашуун түшүм алуу күтүлүүдө.
