Соң-Көлдө жайыт мыйзамдарын бузгандар 82,5 миң сомго айыпка жыгылды
Жерди жана сууну көзөмөлдөө боюнча кызматтын Нарын облусу боюнча аймактык башкармалыгы жайыт жерлерин коргоо жана жер мыйзамдарынын талаптарынын сакталышын камсыз кылуу боюнча көзөмөлдү күчөттү. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Мекеменин маалыматына ылайык, Ат-Башы, Нарын, Жумгал, Кочкор, Ак-Талаа райондорунун мамлекеттик администрацияларына жана Нарын шаарынын мэриясына калк арасында түшүндүрүү иштерин күчөтүү боюнча кызматтык каттар жөнөтүлдү. Анда жайыттарда техникаларды мыйзамсыз пайдаланууга жол бербөө жана туруктуу көзөмөл жүргүзүү тапшырылган.
Мындан тышкары, аймактык башкармалыктын кызматкерлери жайыттарда рейддик жана мониторингдик текшерүүлөрдү жүргүзүштү.
Текшерүүнүн жүрүшүндө Кочкор районундагы Соң-Көл жайытында мыйзам талаптарын бузган 11 жаран аныкталды. Аларга Кыргыз Республикасынын Укук бузуулар жөнүндө кодексинин 252-беренесинин негизинде ар бирине 7 500 сомдон, жалпысынан 82 500 сом өлчөмүндө административдик айып салынды.
Аталган кызмат мындай көзөмөл иш-чаралары жайыттарды мыйзамсыз пайдаланууга жол бербөө жана жер мыйзамдарынын талаптарынын аткарылышын камсыз кылуу максатында улантыларын билдирди.
