Бостеридеги эс алуу борборунда мыйзамсыз курулуштар аныкталды
Ысык-Көл облусунун Бостери айылындагы "Борбор" эс алуу борборунун аймагында жайгашкан курулуш объекттерине пландан тышкаркы текшерүү жүргүзүлүп, шаар куруу мыйзамдарынын талаптарын бузуу менен курулган жана пайдаланылып жаткан бир катар объекттер аныкталды.
Курулуш, архитектура жана турак жай-коммуналдык чарба министрлигинин маалыматына ылайык, текшерүүнү Мамлекеттик архитектура-курулуш контролдоо департаментинин Ысык-Көл региондук башкармалыгы жүргүзгөн.
Текшерүүнүн жүрүшүндө жеке жактарга таандык бүтпөй калган эки кабаттуу курулуш объектиси, үч жана эки кабаттуу конок үйлөрү, бир нече ашкана, бир кабаттуу кафе, ошондой эле кызматкерлер үчүн курулган имараттар мыйзам талаптарын бузуу менен курулуп, пайдаланылып жатканы аныкталган.
Аныкталган мыйзам бузуулар боюнча тиешелүү актылар түзүлүп, объект ээлерине кемчиликтерди жоюу үчүн 10 күндүк мөөнөт берилди.
Белгиленген мөөнөт аяктагандан кийин жазуу түрүндө берилген көрсөтмөлөрдүн аткарылышы кайрадан текшерилет. Эгерде мыйзам бузуулар белгиленген мөөнөттө жоюлбаса, күнөөлүү жактар Кыргыз Республикасынын мыйзамдарына ылайык жоопкерчиликке тартылары белгиленди.
