Таш-Көмүрдөгү "Кристалл" заводундагы 80 тоннага жакын уулуу химикат жок кылынат
Жалал-Абад облусунун Таш-Көмүр шаарындагы "Кристалл" заводунун аймагында топтолгон 80 тоннага жакын уулуу химикаттарды экологиялык жактан коопсуз утилизациялоо боюнча долбоор ишке ашырыла баштайт. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Маалыматка ылайык, долбоор үч тараптуу макулдашуунун негизинде Өзгөчө кырдаалдар министрлиги жана "Росатом" мамлекеттик корпорациясына караштуу "Федералдык экологиялык оператор" федералдык мамлекеттик унитардык ишканасы менен биргеликте жүзөгө ашырылат.
"Кристалл" заводу советтик мезгилде поликристаллдык кремнийди жана жарым өткөргүч материалдарды өндүргөн стратегиялык өнөр жай объектиси болгон. Учурда заводдун аймагындагы атайын металл цистерналарда 80 тоннага жакын уулуу химикаттар сакталууда.
Бул кооптуу калдыктарды утилизациялоо маселеси акыркы 15 жылдан бери чечилбей келген. Моралдык жана физикалык жактан эскирген жабдуулар аймактагы экологиялык коркунучту күчөтүп, көйгөй Советтер Союзунан калган экологиялык мурастардын бири катары сакталып келген.
Практикалык иштерди 2026-жылдын ноябрь айында баштоо пландалууда. Суук мезгилдин тандалышы утилизациялоо процессиндеги техникалык коопсуздук талаптары менен түшүндүрүлөт.
Долбоорду 2027-жылы толук аяктоо мерчемделүүдө.
