Финкөзөмөл соцтармактагы инвестициялык жарнамалардан сак болууга чакырды
Интернет булактарында жогорку кирешелүүлүктү убада кылган, жабык инвестициялык программаларга катышууну жана кызматташуунун башка түрлөрүн сунуштаган инвестициялык жарнамалар көбөйүүдө. Мындай жарнамалар жарандарда аталган долбоорлордун ишенимдүүлүгү жана кирешелүүлүгү тууралуу жаңылыш түшүнүк жаратышы мүмкүн.
Ушуга байланыштуу инвестициялык чечим кабыл алардан мурда, Финкөзөмөл төмөнкүлөргө көңүл бурууну сунуштайт:
- уюмдун мамлекеттик каттоосун жана укуктук статусуна;
- инвестициялык иш жүргүзүүгө лицензиясы же уруксаты бар-жогуна;
- акча салууну сунуштап жаткан адамдын тиешелүү ыйгарым укуктарына;
- келишимдеги шарттарды, анын ичинде акча каражаттарын пайдалануу жана кайтарып берүү тартибине;
- уюмдун финансылык абалын жана инвестициядан келип чыгышы мүмкүн болгон тобокелдиктерди текшерүү зарыл.
Маанилүү: КРнын мыйзамдарына ылайык, финансылык жана инвестициялык кызмат көрсөтүүлөрдүн келечектеги натыйжалуулугу (кирешелүүлүгү) боюнча кепилдиктерди, убадаларды же божомолдорду жарнамада көрсөтүүгө жол берилбейт.
Андыктан, жарнамада “жогорку” же “кепилденген” кирешелүүлүктүн көрсөтүлүшү, финансылык терминдердин жана инвестициялык инструменттердин колдонулушу уюмдун ишинин мыйзамдуулугун ырастабайт жана салынган каражаттардын сакталышына кепилдик бербейт.
Финкөзөмөл жарандарды инвестициялык чечим кабыл алардан мурда сунушталган маалыматтарды кылдат текшерип, акча салууга байланыштуу тобокелдиктерди баалоого чакырууда.
