Мобилдик операторлор эч качан SMS-кодду сурабайт
Ош шаарында жарандарды кибер алдамчылыктан коргоо жана интернет аркылуу жасалган кылмыштарды алдын алуу максатында шаардык милиция түшүндүрүү иш-чарасын өткөрүүдө.
Ош шаардык ички иштер башкармалыгынын Ак-Буура милиция бөлүмүнүн кызматкерлери тарабынан шаардын коомдук жайларында жана коомдук транспорттордо жарандарга кибер алдамчылыктын кеңири тараган түрлөрү тууралуу маалымат берилип, эскертүү баракчалары көрүнүктүү жерлерге илинди.
Адистердин айтымында, бүгүнкү күндө алдамчылар жарандарга телефон чалып, өздөрүн уюлдук байланыш операторлорунун кызматкери катары тааныштырып, ар кандай шылтоолор менен SMS аркылуу келген кодду айтып берүүнү талап кылган учурлар кездешүүдө. Мындай коддорду алдамчыларга айтып берүү жарандардын жеке маалыматтарына, социалдык тармактарына жана банктык эсептерине кирүүгө алып келиши мүмкүн.
Ушуга байланыштуу милиция кызматкерлери жарандарга эскертет:
- телефонго келген SMS-коддорду жана сыр сөздөрдү эч кимге айтпоо;
- банк картанын маалыматын, PIN-коддорду жана башка жеке маалыматтарды бербөө;
- шектүү шилтемелерди ачпоо;
- белгисиз адамдардын көрсөтмөсү менен акча которбоо;
- өзүн банк кызматкери, милиция кызматкери же уюлдук оператордун өкүлү десе ишенбөө керек.
Шектүү жагдайларга туш болгон учурда, дароо оператордун расмий номерине кайра чалып тактоо же милиция кызматкерлерине кайрылуу сунушталат.
