Бакай-Атадагы социалдык мекемеге жаңы имарат куруу маселеси каралууда
Финансы министрлиги Бакай-Ата районунда улгайган адамдар жана ден соолугунун мүмкүнчүлүктөрү чектелүү жарандар жашаган социалдык мекемеге камкордук көрсөтүп, жаңы имарат куруу маселесин карап жатат. Бул тууралуу министрликтин басма сөз кызматы билдирди.
Маалыматка ылайык, мекемеде учурда 78 адам - 34 аял жана 44 эркек жашайт. Финансы министри Руслан Сүйүналиев Талас облусуна болгон иш сапарынын алкагында мекемеге барып, жашоочулар менен жолугушуп, алардын шарттары жана муктаждыктары менен таанышты.
Мекеменин материалдык-техникалык базасын жакшыртуу үчүн 20 функционалдык керебет, 60 ортопедиялык матрас, 60 бир кишилик керебет, 80 тумбочка, 40 шкаф, 40 тамактануучу стол, 80 отургуч, 80 жууркан, 80 төшөк жабуусу жана 80 жаздык тапшырылды.
Мындан тышкары, медициналык жана чарбалык керектелүүчү буюмдар, ошондой эле "Желмаян" жеңил транспорт каражаты сатып алынды.
Министрлер Кабинетинин тескемесине ылайык, Финансы министрлиги аталган мекемеге камкордук көрсөтүүнү өз милдетине алган. Министрлик жаңы имарат куруу маселесин да карап жатат.
