Бишкекте мурдагы борбордук мечиттин имараты бузулуп, кайрадан салынышы күтүлүүдө
Бишкек шаарындагы Гоголь көчөсү, 55 дарегинде жайгашкан Кимсанбай ажы Абдурахманов атындагы мурдагы борбордук мечиттин имаратын демонтаждоо иштери башталды. Жергиликтүү тургундардын маалыматына караганда, учурда жумушчулар имараттын негизги бөлүгүн бузуп, аймакта оор техника иштеп жатат.
Мечитти толугу менен жаңылоо планы тууралуу 2026-жылдын март айында белгилүү болгон. Анда Бишкек шаарынын мэри Айбек Жунушалиевге долбоор мечитке келгендер менен жолугушуу учурунда тааныштырылган.
Мэриянын маалыматына ылайык, учурдагы имарат авариялык абалда болуп, аны оңдоп-түздөө мүмкүн эмес деп табылган. Ошондуктан имаратты толугу менен бузуп, ордуна жаңы мечит куруу чечими кабыл алынган.
Долбоор боюнча жаңы мечит эки кабаттуу болуп, жалпы аянты 5 851,3 чарчы метрди түзөт. Намаз окуу залынын аянты бир убакта 4 200 адамга чейин кабыл алууга мүмкүндүк берет.
Жаңы имаратта намаз окуу жайларынан тышкары, жер алдындагы унаа токтотуучу жай, административдик бөлмөлөр, даарат алуу жайлары, кампалар, кафе жана дүкөнчөлөр каралган.
