ЕАЭБде жыгач таңгактарга байланыштуу талаптар жеңилдетилди
Евразия экономикалык биримдигинде жыгачтан жасалган таңгактоочу жана бекитүүчү материалдарды ташууга байланыштуу талаптар жеңилдетилди. Бул тууралуу Айыл чарба министрлиги билдирди.
Маалыматка караганда, Евразия экономикалык комиссиясынын Кеңеши 2026-жылдын 9-сентябрында ЕАЭБдин бажы чек арасындагы жана бажы аймагындагы карантиндик фитосанитардык көзөмөлгө алынуучу карантиндик продукциялардын, жүктөрдүн, материалдардын жана товарлардын тизмесине өзгөртүү киргизүү боюнча чечим кабыл алды.
Жыйынга Суу ресурстары, айыл чарба жана кайра иштетүү өнөр жайы министринин орун басары Мирбек Дуйшеев катышты.
Кабыл алынган чечимге ылайык, жыгачтан жасалган таңгактоочу жана бекитүүчү материалдар эл аралык стандарттардын талаптарына ылайык тиешелүү фитосанитардык иштетүүдөн өткөн жана эл аралык маркировкасы бар болгон учурда фитосанитардык сертификат менен милдеттүү түрдө коштолуудан бошотулат.
Буга чейин мындай материалдарда эл аралык маркировка болгон күндө да кошумча фитосанитардык сертификатты тариздөө талап кылынган. Жаңы тартип бул талапты жоюуга мүмкүндүк берет.
Мындай өзгөртүү ишкерлер үчүн административдик жол-жоболорду жөнөкөйлөтүп, керектүү документтердин санын азайтууга жана жүктөрдү тариздөөгө кеткен убакытты кыскартууга шарт түзөт. Ошондой эле ЕАЭБге мүчө мамлекеттердин ортосунда товарларды ташууну жеңилдетүүгө багытталган.
Министрликтин маалыматына ылайык, жаңы талап фитосанитардык коопсуздуктун деңгээлин төмөндөтпөйт. Анткени эл аралык маркировка жыгачтан жасалган таңгактоочу же бекитүүчү материалдын белгиленген эл аралык талаптарга ылайык фитосанитардык иштетүүдөн өткөндүгүн тастыктайт.
