Кырчында Дүйнөлүк көчмөндөр оюндары өткөн аймак калыбына келтириле баштады
Кырчын жайлоосунда Дүйнөлүк көчмөндөр оюндары учурунда пайдаланылган аймактарды калыбына келтирүү боюнча атайын экологиялык акция болуп өттү. Бул тууралуу Жаратылыш ресурстары, экология жана техникалык көзөмөл министрлигинин маалымат кызматынан кабарлашты.
Билдирүүгө караганда, бул иштер 12-сентябрда Кырчын капчыгайында кыртышты жана өсүмдүк катмарын калыбына келтирүү боюнча биргелешкен экологиялык акцияга - Жаратылыш ресурстары, экология жана техникалык көзөмөл министрлиги, Маданият, маалымат, спорт жана жаштар саясаты министрлиги, ошондой эле жергиликтүү бийлик өкүлдөрүнөн турган 100гө жакын адам катышты.
Акциянын жүрүшүндө жергиликтүү климатка ылайыкташкан көп жылдык шалбаа чөптөрүнүн жана эндемикалык өсүмдүктөрдүн уруктары себилип, тиешелүү агротехникалык иштер жүргүзүлдү.
Акциянын негизги максаты — Кырчын жайлоосунда көчмөндөр оюндары учурунда пайдаланылган жерлердин топурагын жана өсүмдүк катмарын калыбына келтирүү болуп саналат.
