Садыр Жапаров: Сыйлык - элге эмгеги сиңгендерге мамлекеттин ыраазычылыгы
Өлкө башчысы Садыр Жапаров бүгүн өлкөнүн социалдык-экономикалык, интеллектуалдык жана маданий өнүгүшүнө салым кошкон жарандарга, ошондой эле Кыргызстандын Эгемендүүлүк күнүнө карата мамлекеттик сыйлыктарды тапшырды. Бул тууралуу президенттин администрациясынан кабарлашты.
Мамлекет башчысы сыйлык тапшыруу аземинде мамлекеттик сыйлыктар элге эмгеги сиңген инсандарга мамлекеттин жогорку урматы жана ыраазычылыгы экенин белгиледи.
"Мамлекеттүүлүктү чыңдоодо, рухий-адеп-ахлактык тарбия берүүдө, улуттук биримдикти бекемдөөдө, тигил же бул тармактын өнүгүшүнө салым кошууда өзгөчөлөнгөн мыктыларыбыздын мээнети сөзсүз бааланышы абзел. Сыйлык - бул элге эмгеги сиңген, иштерман инсандарына карата мамлекеттин эң жогорку урматы жана ыраазычылыгы!" - деди Садыр Жапаров.
Президент мамлекеттик сыйлыктарды берүү системасы жаңыртылып, алардын саны оптималдаштырылганын белгиледи.
"Жаңы мыйзамга ылайык, сыйлыктардын саны оптималдаштырылып, алардын салмагы артты. Эми сыйлык чындап татыктуу адамга гана берилиши керек деген принцип катуу кармалышы кажет", - деди ал.
Сыйлык алгандардын арасында маданият жана искусство, илим жана билим берүү, журналистика, медицина жана башка тармактардын өкүлдөрү, ошондой эле Кыргызстанды эл аралык деңгээлде татыктуу таанытып жаткан жаш адистер бар. Мамлекет башчысы алардын эмгеги жаш муун үчүн үлгү болушу керектигин айтып, мамлекетти мындан ары да биргелешип чыңдоого чакырды.
"Жаңы Кыргызстанды куруу жолунда бирге басалы! Биримдигибиз бекем болсо, алдыга койгон улуу максаттарга сөзсүз жетебиз!" – деп баса белгиледи президент.
