Ысык-Көлдө айыл чарба продукциясын өндүрүү жана кайра иштетүү кеңейүүдө
Суу ресурстары, айыл чарба жана кайра иштетүү өнөр жайы министринин орун басары Рысгүл Акимжанова Ысык-Көл облусуна болгон иш сапарынын алкагында айыл чарба продукциясын өндүрүү жана кайра иштетүү менен алектенген кооперативдердин жана ишканалардын ишмердүүлүгү менен таанышты. Бул тууралуу министрликтин маалымат кызматы билдирди.
Маалым болгондой, иш сапардын жүрүшүндө "Ак-Суу органик" кооперативине барып, анын иши менен таанышты. Кооператив органикалык таза продукциялардан кыям, табигый чөптөрдөн чай, ошондой эле жүндөн кийиз жана башка буюмдарды өндүрөт.
Ошондой эле "Ак-Суу Агроплюс" кооперативинин ишмердүүлүгү каралды. Кооператив органикалык таза сүт азыктарын жана картошка өндүрөт. Учурда анын 10 мүчөсү бар. Кооперативдин өкүлдөрү өндүрүштү кеңейтүү максатында кошумча айдоо жерлерин ижарага алуу маселесинде көмөк көрсөтүүнү өтүнүштү. Министрдин орун басары бул маселе мыйзам талаптарына ылайык караларын билдирди.
Мындан тышкары, Рысгүл Акимжанова "Ак-Жалга" ЖАКынын өндүрүштүк ишмердүүлүгү менен таанышты. Ишканада учурда суткасына 40 тонна сүт кайра иштетилип, сыр, быштак, каймак жана башка сүт азыктары өндүрүлөт.
Иш сапардын алкагында "Кредо Бак" кооперативинин иши да каралды. Кооператив өрүктөн шербет өндүрүү менен катар мөмө-жемиштерди сактоочу муздаткыч жайды иштетет.
Жолугушууларда айыл чарба продукциясын кайра иштетүүнү өнүктүрүү, өндүрүштүн көлөмүн көбөйтүү жана жергиликтүү өндүрүүчүлөрдүн ишмердүүлүгүн кеңейтүү маселелери талкууланды.
