Бишкекте Казак медицинасынын күндөрү башталды

Бүгүндөн баштап 18-сентябрга чейин Бишкек шаарында Казак медицинасынын күндөрү өтөт. Бул тууралуу Саламаттык сактоо министрлиги кабарлады.

Маалымдалгандай, ири кесиптик иш-чара Кыргызстан менен Казакстандын медициналык адистеринин ортосунда тажрыйба алмашууну күчөтүүгө жана саламаттык сактоо тармагындагы кызматташтыкты өнүктүрүүгө багытталган.

Иш-чарага Казакстандын алдыңкы медициналык уюмдарынын жана жогорку окуу жайларынын адистери катышат. Төрт күндүн ичинде Бишкектеги бир катар медициналык мекемелерде лекциялар, илимий-практикалык конференциялар, мастер-класстар, клиникалык талкуулар уюштурулат.

Мындан тышкары, адистер бейтаптарга консультация берип, татаал учурларды биргеликте талкуулашат жана биргелешкен операцияларды өткөрүшөт. Иш-чаралар академик Миррахимов атындагы Улуттук кардиология жана терапия борборунда, Эне жана баланы коргоо улуттук борборунда, Тез медициналык жардам клиникалык ооруканасында, Улуттук онкология жана гематология борборунда жана Ахунбаев атындагы Кыргыз мамлекеттик медициналык академиясында өтөт.

Ал эми 15–17-сентябрда Кыргызстандын чек арага жакын аймактарында Казакстандын тармактык адистеринин катышуусунда эки мобилдик медициналык клиника иштейт. Калкка медициналык жардам Аламүдүн районунун Васильевка айылындагы ҮДТда жана Ысык-Ата районунун Хунчи айылындагы ҮДТда көрсөтүлөт.

Казакстандык адистердин катышуусу медицинанын түрдүү багыттарындагы тажрыйбаны бөлүшүүгө, жаңы ыкмаларды талкуулоого жана эки өлкөнүн медициналык мекемелеринин ортосундагы кесиптик байланыштарды бекемдөөгө мүмкүнчүлүк берет.