Бүгүн Кыргызстанда 2026-2027-окуу жылы башталды
Бүгүн Кыргызстанда 2026–2027-окуу жылы жалпы билим берүү уюмдарында башталды. Салттуу түрдө 1-сентябрда окуу жылынын башталбай калгандыгынын себебин Билим берүү жана илим министрлиги Кыргызстанда өткөн Бүткүл дүйнөлүк көчмөндөр оюндарына, Шанхай кызматташтык уюмуна мүчө мамлекеттердин саммитине жана өлкөнүн эгемендүүлүгүнүн 35 жылдык мааракесине байланыштырган.
Окуу программаларынын жана окуу пландарынын толук өздөштүрүлүшүн камсыз кылуу максатында окуу процессине айрым өзгөртүүлөр киргизилет.
Ага ылайык, башталгыч класстар үчүн салттуу беш күндүк окуу режими өзгөрүүсүз сакталат. Ал эми жогорку класстардын окуучулары үчүн окуу жылынын жүрүшүндө кошумча сегиз окуу ишемби күндөрү уюштурулат. Бул болжол менен айына бир жолу ишемби күнү сабак өтүлөрүн билдирет.
Бишкек шаарында биринчи класска 23,8 миңден ашык окуучу кабыл алынган. Алардын ичинен 12,7 миңге жакыны кыргыз тилинде, ал эми 11,2 миңден ашууну орус тилинде билим берүүчү класстарга катталган. Борбор калаада учурда дагы 2,5 миң орун бош калууда.
Окуу жылынын башталышы менен Бишкек шаарынын көчөлөрүндө автоунаалардын тыгыны күчөгөнү байкалууда. Ушундан улам Милициянын кайгуул кызматы башкармалыгы жол кыймылынын эрежелерин так сактоого жана балдардын жолдогу коопсуздугуна өзгөчө көңүл бурууга чакырат.
Айрыкча мектептерге жакын аймактарда унаа башкарууда ылдамдык режимин сактап, жөө жүргүнчүлөргө жол берүү жана жол кыймылынын бардык катышуучуларына этият мамиле кылуу сунушталат.
