ИИМ: чет өлкөлүк жарандарды КРда белгиленген талаптарды так сактоого чакырат
Кыргыз Республикасынын Ички иштер министрлиги чет өлкөлүк жарандарды өлкөдө болуунун жана эмгек ишмердүүлүгүн жүргүзүүнүн белгиленген талаптарын так сактоого чакырат. Кыргызстанда мыйзамдуу иштөө үчүн чет өлкөлүк жаран Бирдиктүү уруксатты тариздөөгө тийиш.
Алар жашаган жери боюнча өз убагында каттоодон өтүүгө жана тиешелүү документтердин мөөнөтүн өз убагында узартууга милдеттүү.
ИИМдин басма сөз кызматынан кабарлагандай - студенттик, туристтик, ишкердик жана "Сапар" визалары менен келген чет өлкөлүк жарандарга эмгек ишмердүүлүгүн жүргүзүүгө жол берилбейт. Ошондой эле чет өлкөлүк жаран Бирдиктүү уруксатта көрсөтүлгөн иш берүүчүдө гана иштөөгө укуктуу.
Ал эми миграциялык талаптарды бузуу Кыргыз Республикасынын мыйзамдарына ылайык жоопкерчиликке жана айып пул салууга алып келет.
Ушуга байланыштуу Ички иштер министрлиги чет өлкөлүк жарандарды Кыргыз Республикасынын мыйзамдарын, каада-салтын жана маданиятын урматтап, коомдук тартипти сактоого чакырууда.
