Кыргызстанда топурак-химиялык лаборатория биринчи жолу аккредитациядан өттү
Курулуш министрлигине караштуу Инженердик изилдөөлөр департаментинин топурак-химиялык лабораториясы аккредитациядан өттү. Бул тууралуу министрликтин басма сөз кызматы кабарлады.
Лаборатория Экономика министрлигине караштуу Кыргыз аккредитациялоо борборунан аккредитацияланып, ага № KG417/КЦА.ИЛ.167 аккредитациялоо аттестаты берилди.
Министрликтин маалыматына караганда, лаборатория өлкөдөгү ушул багыттагы мамлекеттик мекемелердин арасында биринчи болуп аккредитациядан өттү. Анда топурактын, суудагы эритмелердин жана жер алдындагы суулардын химиялык, физикалык-механикалык көрсөткүчтөрү изилденет.
Изилдөөлөрдүн жыйынтыктары инженердик изилдөө иштеринде, долбоорлоодо жана курулушта колдонулат. Аккредитация лабораториянын техникалык компетенттүүлүгүн жана жүргүзүлгөн изилдөөлөрдүн ишенимдүүлүгүн тастыктайт.
