Караколдо мыйзамсыз курулуштар аныкталды
Каракол шаарында курулуш мыйзамдарын жана тиешелүү ченемдерди бузган эки объект аныкталды. Бул тууралуу Курулуш министрлиги кабарлады.
Маалымдалгандай, Мамлекеттик архитектура-курулуш контролдоо департаментинин Ысык-Көл региондук башкармалыгынын текшерүүсүндө Кадыров көчөсү 92 дарегиндеги конок үйү жеке турак жай курууга арналган жер тилкесинде жайгашканы белгилүү болгон. Жер тилкесинин жана турак жайдын багыты өзгөртүлбөстөн, объект конок үйү катары пайдаланылып келген.
Ошондой эле Коенкозов көчөсү 10 дарегиндеги көп батирлүү турак жайларда тиешелүү уруксат документтери жок курулуш иштери жүргүзүлгөнү аныкталган.
Мыйзам бузуулар боюнча жооптуу тараптарга актылар түзүлүп, Укук бузуулар жөнүндө кодексинин 144-беренесине ылайык административдик чаралар көрүлдү.
