Кыргызстан Кореяда критикалык минералдарды өнүктүрүү стратегиясын сунуштады
Кыргызстандын Жаратылыш ресурстары, экология жана техникалык көзөмөл министри Акыл Токтобаев Сеул шаарында өткөн "Корея - Борбордук Азия" биринчи бизнес-саммитинде критикалык минералдарды өнүктүрүү стратегиясын тааныштырды. Бул тууралуу аталган министрликтен билдиришти.
Маалымдалгандай, Акыл Токтобаев Кыргызстандын ресурстук потенциалы жогору экенин белгилеп, тоо-кен тармагын диверсификациялоонун жана критикалык минералдар секторун өнүктүрүүнүн маанилүүлүгүнө токтолду.
Кыргызстан геологиялык чалгындоо жана казып алуудан тартып, сырьёну байытуу жана кайра иштетүүгө чейинки бардык этаптарда эл аралык өнөктөштөр менен кызматташууга даяр экенин билдирди.
Стратегия тармактын айкындуулугун жогорулатуу, инвесторлор үчүн туруктуу шарттарды түзүү, инфраструктура жана технологияларды өнүктүрүү, эл аралык каржылоону кеңейтүү, ошондой эле ESG принциптерин сактоо жана жергиликтүү жамааттарды колдоону камтыйт.
Министр инвесторлорду, технологиялык компанияларды жана финансылык институттарды критикалык минералдар боюнча биргелешкен долбоорлорду ишке ашырууга чакырды.
