Садыр Жапаров Корея парламентинин спикери менен жолугушту
Мамлекет башысы Садыр Жапаров бүгүн Сеул шаарында Корея Республикасынын Улуттук жыйынынын спикери Чо Чжон Шик менен жолугушту. Бул тууралуу президенттин администрациясы билдирди.
Маалыматка караганда, жолугушууда Кыргызстан менен Кореянын саясий, соода-экономикалык, инвестициялык жана маданий-гуманитардык кызматташтыгы талкууланды. Мамлекет башчысы парламенттер аралык байланыштарды күчөтүүнүн маанилүүлүгүн белгилеп, эки өлкөнүн депутаттык топтору жана тиешелүү комитеттеринин кызматташуусун активдештирүүнү сунуштады.
Садыр Жапаров ошондой эле Кореяда иштеген кыргызстандыктарга байланышкан маселелерге токтолду. Анын айтымында, мекендештердин санынын өсүшүнө байланыштуу социалдык камсыздандыруу жана пенсиялык камсыздоо боюнча мамлекеттер аралык келишимди тез арада даярдап, кол коюу зарыл.
Президент "Борбордук Азия - Корея Республикасы" форматындагы парламент спикерлеринин кийинки жолугушуусун Бишкекте өткөрүүгө Кыргызстан даяр экенин билдирди.
Өз кезегинде Чо Чжон Шик парламенттер аралык диалог эки өлкөнүн жакындашуусунда маанилүү роль ойной турганын белгиледи. Ал кызматташуунун артыкчылыктуу багыттары катары жасалма интеллект, алдыңкы технологиялар, энергетика жана саламаттык сактоо тармактарын атады.
Спикер Кыргызстанда кореялык компанияларды колдоо максатында KOTRAнын өкүлчүлүгүн ачуу пландалып жатканын да билдирди.
Жолугушуунун соңунда Садыр Жапаров Чо Чжон Шикти Кыргызстанга расмий сапар менен келүүгө чакырды. Корея парламентинин спикери чакырууну кабыл алды.
