YUTONG үлгүсүндөгү жаңы автобустар каттамга чыга баштады
Бишкек шаарынын мэриясынын демилгеси менен шаарга кондиционер менен жабдылган, узундугу 12 метр болгон YUTONG үлгүсүндөгү 95 жаңы автобус алып келинген. Учурда бул автобустар этап-этабы менен шаардык каттамдарга чыгарылып, жүргүнчүлөрдү тейлей баштады.
Шаардык мэриядан билдиргендей, бүгүн таңкы саат 5:00дөн тарта алгачкы 17 жаңы автобус каттамга чыгып, жүргүнчүлөрдү тейлөөгө киришти. Буга чейин №153 каттамда иштеп келген автобустар башка шаардык каттамдарга бөлүштүрүлдү. Ал эми №153 каттамга жаңы YUTONG автобустары чыга баштады.
Билдирүүгө караганда, жакынкы убакта калган YUTONG автобустары да этап-этабы менен каттамга чыгарылып, шаардагы башка каттамдарга бөлүштүрүлөт.
Жаңы автобустарды акырындык менен каттамдарга чыгаруу шаардык каттамдардагы заманбап коомдук транспорттун санын көбөйтүүгө, жүргүнчүлөр үчүн ыңгайлуу шарттарды түзүүгө жана тейлөөнүн сапатын жогорулатууга мүмкүндүк берет.
