Бишкекте Казак медицинасынын күндөрүнүн жыйынтыгында 7 меморандумга кол коюлду
Бүгүн Иса Ахунбаев атындагы Кыргыз мамлекеттик медициналык академиясында 15-18-сентябрда өткөн Казак медицинасынын күндөрүнүн жыйынтыгы чыгарылды. Бул тууралуу Саламаттык сактоо министрлиги кабарлады.
Иш-чарага Саламаттык сактоо министри Дамир Осмонов, Казакстандын Саламаттык сактоо боюнча вице-министри Манас Рамазанов, Казакстандын Кыргызстандагы Атайын жана Ыйгарым укуктуу элчиси Абылкаир Скаков, эки өлкөнүн медициналык уюмдарынын жана ЖОЖдордун жетекчилери катышты.
Күндөрдүн алкагында эки өлкөнүн алдыңкы дарыгерлери биргелешкен операцияларды, клиникалык консультацияларды, мастер-класстарды жана илимий сессияларды өткөрүштү. Багыттар: кардиология, онкология, педиатрия, травматология, акушердик, офтальмология жана реабилитация.
"Медицинада чек ара жок. Бул биргелешкен операциялар жана мастер-класстар жөн гана тажрыйба алмашуу эмес. Бул алдыңкы технологиялардын реалдуу трансфери жана бейтаптарга көрсөтүлгөн конкреттүү жардам", - деп белгиледи Саламаттык сактоо министри Дамир Осмонов.
Практикалык иш катары Аламүдүн жана Ысык-Ата райондорунда эки көчмө медициналык комплекс иштеди. Алматы облусунан келген адистер 1 310 тургунду кароодон өткөрүп, 774 консультация берип, 1 000ге жакын диагностика жасады. Анын ичинде 368 УЗИ, 150 КТ жана 90 маммография.
"Бул күндөр Казакстан менен Кыргызстандын бир туугандык жана коңшулаш мамилелеринин практикалык уландысы болду. Түз кесиптик диалог жана дарыгерлердин биргелешкен иши өзгөчө мааниге ээ", - деди Казакстандын Саламаттык сактоо вице-министри Манас Рамазанов.
Жыйынтык катары 7 меморандумга кол коюлду. Документтер кардиология, эне жана баланын ден соолугу, офтальмология, травматология жана билим берүү жаатындагы кызматташтыкты камтыйт.
Тараптар саламаттык сактоону санариптештирүү жана кадрларды даярдоо боюнча кызматташтыкты улантарын билдиришти.
