Чүй районунда кышка даярдык: 221 тонна көмүр келди
Чүй районунда 2026/2027-жылдагы күз-кыш мезгилине даярдык жүрүүдө. Бул тууралуу райондук администрация билдирди.
Маалымдалгандай, даярдык министрлер кабинетинин 9-июндагы №404 токтомунун жана президенттин Чүйдөгү өкүлүнүн 19-июндагы №123 буйругунун негизинде жүрүүдө. Район акиминин 29-июндагы №183 тескемеси кабыл алынган.
Аким Осмоновдун төрагалыгында штаб жыйыны өтүп, социалдык объектилерди жана калкты көмүр менен камсыздоо маселеси каралды.
Бүгүнкү күндө Онбир-Жылга айыл өкмөтүнө 221 тонна көмүр келип түштү. Анын ичинен ФАПтар үчүн каралган 113 тонна көмүр толук жеткирилип, жабык кампаларга киргизилди.
Райондо калкты көмүр менен камсыз кылуу үчүн 3 көмүр базасы - Онбир-Жылга, Бурана жана Чүй айыл өкмөттөрүндө уюштурулду. Калган айыл өкмөттөргө көмүр 1-октябрга чейин жеткирилери күтүлүүдө.
