Китеп маселесине кошумча 7 млрд сом бөлүндү
Мектептердеги китеп жетишсиздигине байланыштуу өлкө башчысы Садыр Жапаров кошумча 7 млрд сом бөлүү чечимин кабыл алды. Бул тууралуу президенттин басма сөз катчысы Аскат Алагөзов билдирди.
Анын айтымында, бул көйгөй бүгүн эле пайда болгон эмес. Мурда китеп басууга жылына орточо 100 млн сом бөлүнүп келсе, акыркы эки жылда эле 1,3 млрд сомдон ашык каражат бөлүнгөн.
Мурдагы каржылоо менен эсептегенде, мынча акчаны бөлүү үчүн 10 жылдан ашык, ал эми бардык муктаждыкты жабуу үчүн 50 жылдан ашык убакыт кетмек. Акыркы эки жылда 9,6 миллиондон ашык жаңы китеп басылып чыкты. Бирок бул дагы жетишсиз болуп калды.
Ал ошонлой эле окуучулардын саны өсүп жатканын, өлкө 12 жылдык билим берүүгө өтүп жатканын белгиледи. Бирок муну шылтоо кылууга болбой турганын, ар бир бала китеп менен камсыз болушу керектигин айтты.
Эми Агартуу министрлиги ар бир мектеп боюнча кайсы китептен канчасы жетишпей жатканын жана качан келерин сайтына ачык чыгарышы керек.
Ошондой эле базарда мамлекеттик китептер сатылып жатканы боюнча текшерүү башталды. Канча китеп басылды, кайда кетти, базарга кантип чыкты - баары текшерилип, күнөөлүүлөр жооп берери айтылды.
"Бир дагы окуучу китепсиз калбашы керек. Каражат жетишпейт деген маселе жок. Бизге шылтоо эмес, жыйынтык керек", - деп белгиленет билдирүүдө.
