Кыргызстан менен Орусиянын биргелешкен абадан коргонуу күчтөрүнүн машыгуусу болуп өттү

Балыкчы шаарында Кыргызстан менен Орусиянын Биргелешкен аймактык абадан коргонуу системасынын нөөмөттөгү күчтөрүнүн штабдык машыгуусу аяктады. Бул тууралуу Коргоо министрлиги кабарлады.

Маалыматка ылайык, иш-чара бүгүн "Эдельвейс" окуу-машыгуу борборунда өттү. Машыгуунун жүрүшүндө штабдык машыгуунун жыйынтыктары угулуп, катышуучулар аткарылган иштерди жыйынтыктап, абадан коргонуу күчтөрүнүн өз ара аракеттенүүсүн мындан ары өркүндөтүү маселелерин талкуулашты.

Машыгуу бекитилген планга ылайык өз ара аракеттенүү маселелерин иштеп чыгууга жана башкаруу органдарынын, ошондой эле Биргелешкен абадан коргонуу системасынын нөөмөттөгү күчтөрүнүн практикалык көндүмдөрүн өркүндөтүүгө мүмкүндүк берди.

Жыйынтыгында Кыргызстан менен Орусиянын абадан коргонуу күчтөрүнүн өз ара аракеттенүүсүн мындан ары өркүндөтүүнүн багыттары аныкталды.