Ысык-Көлдө "Ак Суу" туризм лицейинин алгачкы окуу жылы башталды
Ысык-Көлдүн Ак-Суу районунда "Ак Суу" Республикалык инновациялык туризм кесиптик лицейинде алгачкы окуу жылы башталды. Бул тууралуу Агартуу министрлиги билдирди.
"Билим аркылуу бийиктиктерге" аттуу иш-чарага окуучулар, ата-энелер, педагогдор жана иш берүүчүлөр жана өнөктөштөр катышып, лицейдин концепциясы жана туризм тармагындагы кесиптер менен таанышты.
"Биздин лицей үчүн бул жөн гана сабактардын башталышы эмес, жаңы билим берүү жамаатынын жаралышы. Ар бир окуучу өзүнүн маанилүүлүгүн сезип, тандаган кесибинин келечегин көрүшүн каалайбыз. Билим, урматтоо, кызматташтык жана айлана-чөйрө үчүн жоопкерчилик адамга чыныгы бийиктиктерди багындырууга жардам берет", - деди лицейдин директору Банур Абдиева.
Иш-чарада тематикалык станциялар уюштурулуп, катышуучулар билим берүү, кесиптик багыт, коопсуздук жана инсандык өнүгүү боюнча интерактивдүү сабактарга катышты.
Белгилей кетсек, жаңы лицей өлкөнүн туризм индустриясы үчүн кадрларды даярдоодо негизги борбор болууну көздөйт.
