Курулуш ченемдеринин талаптары сакталбаганарга 200 000 сом айып салынды
Курулуш министрлигине караштуу Мамлекеттик архитектура-курулуш контролдоо департаменти Бишкек шаарынын, Фрунзе көчөсү 176 дарегинде курулуп жаткан көп кабаттуу турак жайды текшерүү жүргүзүп, бир катар мүчүлүштүктөрдү табышты. Бул тууралуу Курулуш министрлигинен кабарлашты.
Билдирүүгө караганда, жергиликтүү тургундун кайрылуусунун негизинде Бишкек шаарындагы курулуш объектисинде текшерүү жүргүзүлүп, андан адистер курулуш ченемдеринин талаптары сакталбагандыгын, курулуш калдыктары коңшу аймакка түшүп, жарандардын коопсуздугуна коркунуч жаралып жаткандыгын аныкташкан.
Аныкталган мыйзам бузуулар боюнча курулуш иштерин жүргүзгөн “Бийком” ЖЧКсына тиешелүү акт түзүлүп, мыйзам талаптарына ылайык 200 000 сом өлчөмүндө айып пул салынды.
Мындан тышкары, мыйзам бузууларды жоюу жана коопсуздук талаптарын камсыз кылуу боюнча белгиленген мөөнөттө тиешелүү чараларды көрүү тапшырылды.
