Жогорку Кеңеш ар кыл тармактын алдыңкы адистерине сыйлыктарды тапшырды
Бүгүн, ЖКтин төрагасы Марлен Маматалиев ар кыл тармактын алдыңкы адситерине Жогорку Кеңештин сыйлыктарын тапшырды. Сыйлык тапшыруу аземинде Маматалиев мамлекеттин өнүгүшү ар бир жарандын жасаган ишине көз каранды экенин белгилеп өттү.
Жогорку Кеңештин басма сөз кызматынын маалыматында, кимдер жана кандай эмгеги үчүн сыйлыктарды алгандыгы тууралуу так маалымдалган эмес. Билдирүүгө караганда, төрага өз сөзүндө - Кыргызстандын башкы байлыгы – эл. Ошондуктан, элдин бакубат жашоосу үчүн кам көрүп, өлкөбүздүн келечеги үчүн талыкпай иш алып баруу кажет - деп, белгилегени айтылат.
Маалыматка ылайык, сыйлыктар билим берүү тармагында жаш муундарга татыктуу тарбия берип келе жаткан мугалимдерге, адам өмүрүн сактоону кесиптик милдети катары аркалаган дарыгерлерге, өлкөбүздүн намысын эл аралык спорттук ареналарда коргогон спортчуларга жана машыктыруучуларга, мамлекеттик жана муниципалдык кызматкерлерге, маданият өкүлдөрүнө, коомдук ишмерлерге жана ар кыл тармакта үзүрлүү эмгектенип келе жаткан алдыңкы адистерге тапшырылган.
