Нарында мыйзамсыз курулуш үчүн 200 миң сом айып салынды
Нарын облусунун Жумгал районунун аймагында мыйзамсыз бетон заводунун курулушу аныкталды. Бул тууралуу Курулуш министрлигинен маалымдашты.
Билдирүүгө караганда, аталган объектинин архитектуралык-долбоорлоо, уруксат берүүчү жана долбоордук-сметалык документтери жок экендиги аныкталган.
Бул өз кезегинде Кыргыз Республикасынын "Шаар куруу жана архитектура" жөнүндө мыйзамынын талаптарын одоно бузуу болуп саналат.
Ошондой эле бетон завод мамлекеттик бирдиктүү курулуш реестрине катталбастан иш алып жүргүзүп келген.
Жыйынтыгында "Ж энд Б Универсал Сервис" ЖЧКсына карата протокол түзүлүп, 200 000 сом айып пул салынды. Мындан тышкары аталган мыйзам бузууларды жоюу боюнча милдеттүү көрсөтмөлөр берилди.
Күндүн негизги жаңылыктары — Telegram каналыбызда
Каналга катталуу
