Бишкекте 42 курулуш объектиси текшерилди
Бишкек шаарында 42 курулуш объектиси текшерилип, жаңы талаптар боюнча түшүндүрүү иштери жүргүзүлдү. Бул тууралуу Курулуш министрлигинин басма сөз кызматынан маалымдашты.
Курулуш министри Нурдан Орунтаевдин буйругуна ылайык, "нөл цикли" аяктаганга чейин курулуп жаткан объектилердеги турак жана турак эмес жайларды сатууга жана жарнамалоого жол берилбейт.
Буга байланыштуу Курулуш министрлигине караштуу Мамлекеттик архитектура-курулуш контролдоо департаментинин Бишкек шаардык башкармалыгы тарабынан II категориядагы 42 курулуш объектисинде текшерүү жана түшүндүрүү иштери жүргүзүлдү.
Иш-чаралардын жүрүшүндө курулуш компанияларынын жана жеке ишкерлердин өкүлдөрүнө жаңы талаптардын мазмуну түшүндүрүлүп, белгиленген тартипти бузууга жол бербөө боюнча эскертүүлөр берилди.
Курулуш министрлиги белгиленген талаптарды бузуу фактылары аныкталган учурда мыйзамдарга ылайык тиешелүү чаралар көрүлөрүн эскертет.
Күндүн негизги жаңылыктары — Telegram каналыбызда
Каналга катталуу
